ထိုင်းက မြန်မာလုပ်သားတွေ နစ်နာကြေး၊ လူမှုဖူလုံရေးကြေးများ ရရှိ


နစ်နာကြေး ပြန်ရရှိခဲ့တဲ့ မြန်မာအလုပ်သမားများ။ (ဓာတ်ပုံ - AAC)ထိုင်းနိုင်ငံမှာ COVID-19 အရေးပေါ်ကာလအတွင်း အလုပ်ပိတ်သိမ်းလို့ နစ်နာခဲ့တဲ့ မြန်မာရွှေ့ပြောင်း အလုပ်သမားတွေ နစ်နာကြေး ပြန်ရခဲ့ကြပါတယ်။ အပြည့်အစုံကို ထိုင်းအခြေစိုက် ဗွီအိုအေ မြန်မာပိုင်း သတင်းထောက် မအေးအေးမာ တင်ပြပေးထားပါတယ်။

မြန်မာအလုပ်သမား သံအရာရှိတွေနဲ့ အလုပ်သမား အကူအညီပေးရေးအဖွဲ့ AAC တို့က ကြိုးပမ်းဆောင်ရွက်ပေးမှုတွေကြောင့် ထိုင်းနိုင်ငံမှာ COVID-19 အရေးပေါ်ကာလအတွင်း အလုပ်ပိတ်သိမ်းပြီး အလုပ်ရှင်က တိမ်းရှောင်သွားတဲ့ ကားအပိုပစ္စည်းစက်ရုံက မြန်မာအလုပ်သမားတွေကတော့ ဒီရက်ပိုင်းမှာပဲ နစ်နာကြေး ရရှိခဲ့ပြီး မဲဆောက်မြို့ အထည်ချုပ်စက်ရုံက အလုပ်သမားတွေကတော့ ကိုဗစ်ကာလ လူမှုဖူလုံရေး အထောက်အပံ့ငွေတွေ ပြန်လည်ရရှိခဲ့တာပါ။ အလုပ်သမားတွေ နစ်နာကြေး ပြန်ရရှိအောင် ကြိုးစားပေးခဲ့တဲ့ AAC အလုပ်သမားကူညီရေးအဖွဲ့ရဲ့ ပြောရေးဆိုခွင့်ရှိသူ ကိုရဲမင်းက အခုလိုပြောပြပါတယ်။

“မဟာချိုင်ကတော့ ကိုဗစ်အစပိုင်းမှာ အလုပ်ပြုတ်ကုန်ကြတယ်။ အလုပ်ရုံက ရေတွေဖြတ်၊ မီးတွေဖြတ်ပြီး ကျနော်တို့ AAC က အစားအသောက်တွေ သွားကျွေးမွေးရတဲ့ အလုပ်သမားတွေ ဖြစ်တယ်။ အစပိုင်းမှာ အလုပ်ရှင်က တိမ်းရှောင်သွားတယ်။ အခုနောက်ပိုင်း အလုပ်သမား တရားရုံးအထိ တက်တဲ့အတွက် နစ်နာကြေးရသွားတာ ဘတ်ငွေ အားလုံး ၂ သန်းကျော် ရသွားတာ။ မဲဆောက်အထည်ချုပ်စက်ရုံကတော့ ပကန်စံခွန်းလို့ခေါ်တဲ့ လူမှုဖူလုံရေးကြေး သွင်းထားတဲ့ အလုပ်သမားတွေဖြစ်တော့ ထိုင်းအစိုးရက ကိုဗစ်ကာလမှာ အလုပ်ရပ်နားတဲ့အတွက် ထိုင်းအစိုးရပေးတဲ့ လူမှုဖူလုံရေး ထောက်ပံ့ကြေးငွေ ပြန်ရသွားတာပါ။”

ထိုင်းနိုင်ငံ မဟာချိုင်ဒေသ ကီလို ၁၂ ကားအပိုပစ္စည်းစက်ရုံက မြန်မာလုပ်သားတွေကတော့ နှစ်ကြီးအလုပ်သမား ၃၃ ဦး၊ အလုပ်သက်တမ်း တနှစ်အောက် အလုပ်သမား ၃၆ ဦး၊ စုစုပေါင်း ၆၉ ဦးအတွက် နစ်နာကြေး ထိုင်းဘတ်ငွေ ၂ သန်းကျော်ကို တရားရုံးမှာ တိုင်ကြားပြီး တောင်းဆိုရာကနေ နစ်နာကြေး ပြန်လည်ရရှိခဲ့တာပါ။

ကိုဗစ် အရေးပေါ်ကာလမှာ အလုပ်ရုံပိတ်သိမ်းပြီး တိမ်းရှောင်သွားတဲ့ စက်ရုံအတော်များများ ရှိပေမယ့် မြန်မာအလုပ်သမားတွေကလည်း တစုတစည်းတည်း တိုင်ကြားနိုင်ခြင်း မရှိခဲ့တာတွေ၊ အလုပ်သမားရေးအဖွဲ့နဲ့ မချိတ်ဆက်နိုင်ခဲ့တာတွေ၊ နေထိုင်စားသောက်ရေး ခက်ခဲလွန်းတာကြောင့် အမှုရင်ဆိုင်တာတွေ မလုပ်တော့ဘဲ နေရပ်ကို နစ်နာကြေးမရဘဲ ပြန်သွားရသူတွေလည်း ရှိခဲ့တာပါ။ အခုလို နစ်နာကြေးတွေ၊ လူမှုဖူလုံရေး ထောက်ပံ့ငွေတွေ ပြန်ရတဲ့အတွက် နေရပ်ပြန်တဲ့သူတွေရော အလုပ်ဆက်လုပ်မယ့်သူတွေရော အဆင်ပြေမှုတွေ ရှိသွားတယ်လို့ ကိုရဲမင်းက ဆိုပါတယ်။

“အခုလိုရသွားတဲ့အတွက် အလုပ်သမားတွေ အသက်ရှူ ချောင်သွားတာပေါ့။ ကိုဗစ်ကာလမှာ ချေးငှားထားတာတွေ ပြန်ဆပ်လို့ရတယ်။ မြန်မာပြည် ပြန်ချင်တယ်ဆိုလည်း လမ်းစရိတ်လေး ရသွားတာပေါ့။ နောက်ထပ် အလုပ်လုပ်ခွင့် လက်မှတ်လေးတွေ သက်တမ်းပြန်တိုးနိုင်ဖို့လည်း အဆင်ပြေသွားတာပေါ့။”

COVID-19 ကပ်ရောဂါကာလမှာ စက်ရုံအတော်များများ ပိတ်သိမ်းလိုက်ရပြီး နိုင်ငံခြားသား အလုပ်သမားတွေ အပါအဝင် အလုပ်လက်မဲ့ဦးရေ ၈ သန်းထက်မနည်း ရှိနေတာပါ။ ဒီကာလအတွင်းမှာ မြန်မာနိုင်ငံသား ၆၆,၀၀၀ ကျော် နေရပ်ပြန်ခဲ့ပြီး အခုလို အဆင်မပြေဖြစ်နေတဲ့ အလုပ်သမားတွေလည်း အများအပြား ရှိနေသေးတာပါ။ ထိုင်းနိုင်ငံမှာ မြန်မာအလုပ်သမား ၃ သန်းထက်မနည်း အလုပ်လုပ်ကိုင်နေကြပါတယ်။



မအေးအေးမာ/ ဗွီအိုအေ ( မြန်မာပိုင်း)

https://burmese.voanews.com/a/myanmar-migrant-workers-thailand/5553819.html


Related news