Most Popular

မူလဆိုက်တွင်ဖတ်ရန် >>>

သမီး ၃ ယောက် မွေးထားတဲ့ အဒေါကြီးရဲ့ ဖြစ်ရပ်

Image



ရွာတရွာမှာ သမီးတွေချည်း ၃ ယောက် မွေးထားတဲ့ အဒေါ်ကြီး တယောက် ရှိတယ် ။ အဲဒီ ရွာမှာပဲ မြို့ကနေ ရောက်လာတဲ့ အင်မတန်မှ အပြောကောင်းပြီး အလုပ် မလုပ်ပဲ လိမ်ညာ စားသောက်နေတဲ့ ပတ်ချွဲနှပ်ချွဲ လူရှုပ် တယောက်လည်း ရှိတယ် ။ အညာဒေသရဲ့ ဓလေ့စရိုက် အရ ရွာသူ ရွာသားတွေဟာ အင်မတန်လည်း ရိုးသားကြ ပါတယ် ။

အဲဒီလိုနဲ့ပဲ အဒေါ်ကြီးရဲ့ သမီး အကြီးဆုံးဟာ လူရှုပ်နဲ့ ညားပါလေရော ။ ကိုလူလည်ကလည်း သူ့ထုံးစံ အတိုင်း ယောက်ခမ နဲ့ ခယ်မတွေကိုပါ အဆင်ပြေအောင် ပြောဆို စည်းရုံးပြီး တအိမ်လုံးရဲ့မေတ္တာကို ရအောင် ယူထားနိုင်ခဲ့ ပါတယ်။

တရက်မှာတော့ လူရှုပ်ရဲ့ဇနီးဟာ အမျိုးသမီးရောဂါတခုနဲ့ ရုတ်တရက် ကွယ်လွန်သွား ပါတယ် ။ မိန်းမဖြစ်သူရဲ့ အသုဘမှာ ကိုလူရှုပ်ဟာ အမျိုးမျိုးသော အလွမ်းအဆွေး တမ်းတမှုတွေနဲ့ ကျူကျူပါအောင် ငိုပါတယ် ။ ယောက်ခမကြီးနဲ့ ခယ်မတွေသာ မက အသုဘ လာကြတဲ့ ပရိသတ်ကြီးကလည်း ကိုလူရှုပ်ရဲ့ အလွမ်းအသောလေးတွေကို နားထောင်ရင်း ကရုဏာဖြစ်မိ ကြတယ် ။

အသုဘ ကိစ္စတွေပြီးလို့ ရက်လည် ဆွမ်းသွပ်တဲ့ အခါ အမျှဝေရင်း ကိုလူရှုပ်က သူရဲ့ နောက်ဆုံး ငိုကြွေးတမ်းတခြင်းကို ဟန်ပန် အပြည့်နဲ့ လုပ်ဆောင်ခဲ့ ပါတယ် ။ ” အောင်မလေး မောင့်အချစ်ရဲ့ … မင်းရဲ့ နောက်ဆုံးအချိန်မှာ တတွတ်တွတ် မှာကြားခဲ့တဲ့ စကားလေး ကို မောင် မပြောရက်ပါဘူးကွယ် … မောင့်ကို ခွင့်လွှတ်ပေးပါတော့ … နောက်ဘဝမှသာ အပြစ်တွေ ကျေအောင် ပေးဆပ်ပါရစေ … ကောင်းမွန်ရာ ဘုံဘဝမှာ မောင့်ကို စောင့်နေပါ … မောင်အရောက် လာခဲ့ပါ့မယ် … တို့နှစ်ဦး ဆုံတဲ့အခါမှသာ မောင့်ကို အပြစ်တင်ပါတော့ မောင့်အချစ်လေးရဲ့ … ” ဆိုပြီး ၄ ၊ ၅ ကြိမ် အော်ဟစ် ငိုယိုပါလေရော ။

နာရေးလာတဲ့ ပရိသတ်တွေနဲ့ ဆွမ်းစားကြွတဲ့ သံဃာတော်တွေလည်း ကရုဏာသက်ရင်း ပြန်သွားကြပါသတဲ့ ။ နာရေး ကိစ္စပြီးတော့ ယောက်ခမကြီးက သမီးကြီးဖြစ်သူရဲ့ နောက်ဆုံး ဆန္ဒကို လိုက်လျောချင်တာကြောင့် ကိုရွှေသားမက်ကို ခေါ်ပြီး ” သမီးကြီးက နောက်ဆုံး ဘာမှာ ခဲ့သလဲ သား … အားမနာနဲ့ အမေ့ကိုပြောပါ … ဘာပဲ ဖြစ်ဖြစ် လုပ်ပေးပါ့မယ် … အမေ့သမီးလေး သူ့ခရီးကို ကောင်းကောင်း သွားပါစေကွယ် ” လို့ ပြောတယ်။

ကိုရွှေသားမက် ကလည်း အပူရုပ်ကို ဟန်လုပ်ရင်း ” ကျနော် မပြောရက်ပါဘူး အမေရယ် ” လို့ မျက်ရည်လေး တစမ်းစမ်း အသံ တိုးတိုး ညင်းညင်းလေး နဲ့ ပြောရှာတယ် ။ အဲဒီလို ကြိမ်ဖန်များစွာ အားနာဖို့ မလိုကြောင်း ယောက်ခမဖြစ်သူက ပြောလေတော့ ဘေးက ခယ်မ အလတ်လေးကို လှမ်းကြည့်ရင်း ” နားနဲ့ မနာဖဝါးနဲ့ နာပါ အမေ … အမေ့သမီးက သူမရှိတဲ့ နောက်ပိုင်းမှာ ဒီအိမ်ကနေ ဘယ်ကိုမှ ထွက်မသွားပဲ ညီမလေးနဲ့ ကျနော့်ကို လက်ထပ်ပါလို့ သေသေ ချာချာ မှာသွားတယ် … ဒါပေမယ့် ကျနော် ဘယ်လို ပြောရက်မှာလဲ အမေရယ် ” လို့ ပြောရင်း ပြောရင်း ငိုချပါလေရော။

သမီးကြီး ဖြစ်သူကို ချစ်ခြင်းကြောင့် ယောက်ခမကြီးခမျာ မကြာခင်မှာပဲ သားမက်ဖြစ်သူကို သမီးအလတ်နဲ့ နေရာချပေး ပါလေရော ။ သားမက် လူရှုပ်ကလည်း ရှေးကထက် တိုးလို့ ကွယ်လွန်သူ ဇနီးစကားကို အလေးထားပြီး မိသားစု အပေါ်မှာ အရင်ကထက် ပိုပြီး ကြင်ကြင်နာနာ ဆက်ဆံပါတယ် ။ ဒါပေမဲ့ မကြာခင်မှာ သမီးအလတ်လေးလည်း အမျိုးသမီးရောဂါ နဲ့ ကွယ်လွန်သွားပြန် ပါလေရော …

အဲဒီ အခါမှာတော့ သားမက်ဟာ သူရဲ့ ငိုချင်းကို အရှိန် ပိုမြှင့်ပြီး သူ့ဘဝ ကံဆိုးကြောင်းတွေရော သူ့ကို ကြင်နာသူ မှန်သမျှ လူ့လောကကြီးက စောစောစီးစီး ထွက်သွားတတ်ကြောင်းတွေ ကိုရော သူဟာ မကောင်းသော ဂြိုလ်ကောင်ကြီးသာ ဖြစ်ကြောင်း ဇနီးများရဲ့ ကိုယ်စား သူသာ သေလိုက်ချင်ကြောင်း တွေကို စီကာပတ်ကုံး ဖွဲ့နွဲ့ပြီး ငိုကြွေးနေပါတယ် ။

ရွာက ရွာသူ ရွာသားတွေလည်း မယားနှယောက် ဆက်တိုက် ယူနိုင်ခြင်းကို မေ့ပျောက်ပြီး ဒီကောင်လေး ကံဆိုးလိုက်တာ ဆိုတဲ့ မှတ်ချက်လေးပြုရင်း ကရုဏာ သက်ကြပြန်ပါတယ် ။

နာရေး ကိစ္စပြီးလို့ ရက်လည် ဆွမ်းသွပ်တဲ့ အခါ အမျှဝေရင်း ကိုလူရှုပ်က သူရဲ့ ဒုတိယမြောက် နောက်ဆုံးငိုကြွေး တမ်းတခြင်းကို အရင်က ထက် ပိုတဲ့ဟန်နဲ့ ထပ်ပြီး လုပ်ဆောင်ခဲ့ပြန် ပါတယ်။

” အောင်မလေး ညီမလေးရဲ့ … မင်းကလည်း မင်းအစ်မလို အကို့ကို နောက်ဆုံး အချိန်မှာ တတွတ်တွတ်မှာကြားခဲ့တဲ့ စကားကို အကို ဘယ်လို ပြောထွက်ပါ့ မတုန်းကွယ် … အကို့ကို ခွင့်လွှတ်ပေးပါတော့ … နောက်ဘဝမှာ အပြစ်တွေ ကျေအောင် ဆပ်ပါရစေ … ကောင်းမွန်ရာ ဘုံဘဝမှာ အကို့ကို စောင့်နေပါ … အကိုတို့ ဆုံတဲ့အခါ မှသာ ကြိုက်သလောက် အပြစ်တင်ပါတော့ ” ဆိုပြီး ရှေးနည်း အတိုင်း ၄ ၊ ၅ ကြိမ် အသံပြာအောင် အော်ဟစ် ငိုယိုပြန် ပါတယ် ။ ပရိသတ်တွေနဲ့ ဆွမ်းစားကြွတဲ့ သံဃာတော်တွေလည်း ယခင်အတိုင်း ကရုဏာ သက်ရင်း ပြန်သွားကြပါတယ် ။

ဒီလိုနဲ့ နာရေး ကိစ္စပြီးတော့ ယောက်ခမကြီးက သမီးဖြစ်သူရဲ့ နောက်ဆုံး ဆန္ဒကို ရိပ်စားမိတာ ကြောင့် သားမက်ကို ခေါ်ရင်း ” သူ့ အစ်မလိုပဲ မှာခဲ့လေသလား သား ” လို့ မေးရှာသတဲ့ ကိုရွှေသားမက် ကလည်း မျက်ဝန်း တဝိုက်က မခြောက်သေးတဲ့ မျက်ရည် စက်တွေကို အကျႌလက်နဲ့ သုတ်ရင်း ငိုသံလေးနဲ့ ” ဟုတ်ကဲ့ပါ အမေ ” လို့ ပြောရင်း တရှုံ့ရှုံ့ ငိုကြွေးလေတယ် ။ မိခင်ကြီးကလည်း ” ဘယ်တတ်နိုင် မလဲကွယ် … သွားလေသူတွေရဲ့ ဆန္ဒ ကိုတော့ လိုက်လျောပေးရမှာပေါ့ ” လို့ပြောရင်း သားမက် ကိုလူရှုပ်ကို သမီးအငယ်ဆုံးလေးနဲ့ နေရာ ချထားပေးပြန် သတဲ့ ။

အဲ ဒီလိုနဲ့ သမီးအငယ်ဆုံးလေး မင်္ဂလာဆောင်ပြီး တဲ့ည အိပ်ခန်းထဲ မဝင်မီမှာ မိခင်ဖြစ်သူက သမီးနဲ့ သားမက်ကို ခေါ်ပြီး ” သမီးလေးရယ် … အခု အမေ့မှာလည်း သမီး တယောက်ပဲ ရှိတော့တယ် သမီး … ကျန်းမာရေးကို အထူး ဂရုစိုက်ပါ … ကျန်းမာအောင် နေပါ … အမေ အထူး မှာချင်တာကတော့ တကယ်လို့ သမီးလည်း သမီးအစ်မတွေလို သေဆုံးခဲ့ရမယ် ဆိုရင် … နောက်ဆုံး စကားလေးကိုတော့ ဆင်ဆင်ခြင်ခြင်ပြောခဲ့ပါ … သမီး သေဆုံးသွားရင် အမေပဲ ကျန်ခဲ့တော့မှာလေ … မလုပ်ကောင်းတာ တွေကို မမှာခဲ့ပါနဲ့ သမီးရယ် … နော် ” လို့ ဆုံးမစကားကို ပြောကြားလိုက်ပါတော့ သတည်း …. ။

ဖိုးသူတော် (www.phothutaw.com)

Credit: thutastar

#

Tags:
  • ,

Latest Comments

Leave a Comment