Most Popular

မူလဆိုက်တွင်ဖတ်ရန် >>>

ဗိုလ်မှူးကတော်ကြောင့် အိမ်ဖော်သေရတယ်ဆိုတဲ့ အမှု တရားလိုကို စစစ်

Image



ဗိုလ်မှူးကတော် ဒေါ်သိင်္ဂီစုကို တတိယမြောက် ရုံးထုတ်လာစဉ်

လှည်းကူးမြို့နယ် အင်းတိုင်သံချပ်ကာ တပ်ရင်းအရာရှိ ရိပ်သာက ဗိုလ်မှူး တစ်ယောက်ရဲ့ အိမ်မှာ အိမ်အကူလုပ်ခဲ့တဲ့ မကရင်မ ခေါ် မခင်သန္တာဦး သေဆုံးမှု အတွက် တတိယ မြောက် ရုံးချိန်း ကို ဇူလိုင် ၁၁ ရက်က ရန်ကုန်တောင်ပိုင်းခရိုင် သံလျင်မြို့နယ် တရားရုံးမှာ စစ်ဆေးခဲ့ပါတယ်။

သေဆုံးသူ မကရင်မ ခေါ် မခင်သန္တာဦး ဘက်ကနေ တရားလိုအဖြစ် တရား စွဲဆိုခဲ့တဲ့ တွံတေးမြို့နယ် အုပ်ဖိုကျေးရွာက ရာအိမ်မှူး ဦးအေးသောင်းကို ပထမဆုံးစတင် စစ်ဆေးခဲ့ရာမှာ တရားလိုနဲ့ တရားခံ ရှေ့နေ နှစ်ဘက်စလုံးက ပြန်လှန် မေးခွန်းတွေ မေးခဲ့ကြပါတယ်။

ဒီအမှုမှာ သံသယရှိတဲ့ တရားခံအဖြစ် ဖမ်းဆီး ခံထားရတဲ့ တပ်မတော် အရာရှိရဲ့ဇနီးဖြစ် ဥပဒေ ဝန်ထမ်း ဖြစ်သူ ဒေါ်သိင်္ဂီစုကို ပြီးခဲ့တဲ့ ရုံးချိန်းတွေတုန်းက ရုံးထုတ် ရာမှာ လုံခြုံရေး အကြီးအကျယ် တင်းကျပ် ထားခဲ့တဲ့အတွက် ဝေဖန်ပြောဆိုတာတွေ ရှိခဲ့ပါတယ်။

 ပြီးခဲ့တဲ့ ရုံးချိန်းတုန်းက လုံခြုံရေး တွေတင်းကျပ်ခဲ့

မကရင်မကို မေလ ၁၉ ရက်က တွံတေးမြို့နယ်က သူ့နေအိမ်ကို အိမ်ရှင် ဒေါ်သိင်္ဂီစုက ပြန်ပို့ခဲ့ အပြီး ခဏအကြာမှာ သေဆုံးသွားခဲ့တာဖြစ်ပါတယ်။

အခု ပထမဆုံး စစ်ဆေးခံရတဲ့ ဦးအေးသောင်းက မကရင်မကို ဆွဲကြိုး ခိုးတယ်လို့ စွပ်စွဲပြီး အခန်းတံခါးပိတ် ရိုက်နှက်တာ၊ ကျောက်ပြင်နဲ့ ထုတာ၊ ဗိုက်ကိုကန်တာ၊ အစာငတ် ရေငတ် ထားတာ ဆိုတာ သူသိခဲ့ တဲ့အတိုင်း ထွက်ဆို ခဲ့တယ်လို့ ဘီဘီစီကို ပြောပါတယ်။

ဒီအမှုကို စစ်ဆေးရာမှာ တရားမျှတမှု ရှိပါ့မလားလို့ စိုးရိမ်နေသူတွေ ရှိပေမယ့် အမှုကို လိုက်ပါ ဆောင်ရွက်ပေး နေတဲ့ ပြည်ထောင်စု ဥပဒေဆိုင်ရာ အထောက် အကူပြု အဖွဲ့က ဒေါ်စန်းစန်းမြင့်ကတော့ အမှုစစ်တာ ပွင့်လင်း မြင်သာတယ်၊ ဥပဒေအရာရှိကလည်း တရားလို ဘက်ကို အသေအခြာ စစ်မေး ပေးတယ်လို့ ဇူလိုင် ၁၁ ရက်က တရားခွင် အခြေအနေကို ပြောပါတယ်။

ခွင့်ပြုချက်ရထားတဲ့ သတင်းမီဒီယာတွေကိုလည်း တရားရုံးထဲအထိ ဝင်ရောက် သတင်းယူခွင့်ပြုတယ်လို့ သူက ပြောပါတယ်။

မကရင်မရဲ့ ရုပ်အလောင်းကို ရင်ခွဲ စစ်ဆေးချက်အရ သူ့ခန္ဓာကိုယ် ပေါ်က ဒဏ်ရာတွေဟာ မသေဆုံးခင် ငါးရက်လောက်က ရခဲ့တဲ့ ဒဏ်ရာတွေ ဖြစ်တယ်လို့ သိရတဲ့အတွက် သေဆုံးသူ မကရင်မ နေခဲ့တဲ့ ကျေးရွာက ရာအိမ်မှူး ဦးအေးသောင်းက တရားလိုလုပ်ပြီး အမှုဖွင့်ခဲ့တာ ဖြစ်ပါတယ်။

အမှုအတွက် တရားလို ဘက်က သက်သေ ၂ဝ ကျော် တင်သွင်းထားပြီး နောက်ထပ် ရုံးချိန်းအဖြစ် ချိန်းဆိုထားတဲ့ ဇူလိုင် ၁၈ ရက်နေ့မှာလည်း တရားလို သက်သေ နောက်တစ်ယောက်ကို ထပ်မံစစ်ဆေး သွားမှာ ဖြစ်ပါတယ်။

BBC Burmese

https://www.bbc.com/burmese







Tags:
  • ,

Latest Comments

Leave a Comment